محرم فؤاد يكتب (( حاله ))

#حاله .....
........
وليه
مانتش مطاوعانى ..
وانا دلوقتى
محتاجلك ...
تسايرينى
 على ورقى ...
نترجم حلم مشتاقلك ..
انا حاسس بدوخة ،
وشيء مفقود على نبضى
وحاجه غريبه
جوايا بتندهلك ...
مانيش قادر على الفرقه
خلاص ،
مافيش قوه تصبرنى ...
تعدينى بحور لايام
وبالكلمات تصبرنى ...
اكيد بكره ..
حيجى اكيد ..
لكن ماعرفشى..
 يلحقنى ..
مايلحقنيش ...
مانيش عارف ..
لكن خايف ...
من الاحلام لتنكرنى ...
وترمينى ف سراب الزيف ...
وافوق من تانى فوق
دمعى ...
بيصلبنى ف كف خريف ...
مايعرفشى
معانى الصلب ف الغربه ..
ودايما سارق الفرحة
وقلب كفيف ..
مالوش ف الحب
ترنيمه ..
بتهرب من شتا غيم
على حدوده ..
وخلى
 حنينه زى الطيف ...
وذنب كبير
مالوش ف التوبه
والغفران ...
وخلانى شبح انسان ...
بيستسمح سنينه
تروق ..
وتجرى ناحية الفرحه
ولو لحظه ..
يطل علينا من خوفها ..
ربيع بحنان ...
غريبه ...
وتوهتينى من بدرى ..
وضيعتى ملامح شوقى
ضيعتينى ..
ضيعتى
كدا العنوان ...